لاتشتكي ياجرح اللي فيني يكفي

السلام عليكم ورحمة الله وبركاته

اصبحتم ، مسيتم بخير جميعآ


مقدمه
كلنْ عنده نقطة ضعف و يتمنى اي احد ما يعرفه و هي بمثابه الجرح ويتمنى ان الجرح ما ينفتح في اي مكان حتى لو بين اهله و قرايبه

ولو انفتح الجرح في اي مكان سواء عام او عند ناس عزيزين عليه يتمنى لو الارض تنشق و تبلعه
او يتمنى يصير اي شيء او مصيبه عشان تلهيهم عنه و تحصل كثير

و في كثير من الناس اصحاب القلوب (العديمة الاحساس) يتميزون باللقافه و التفنن باثاره الحديث حول الجرح و يتلذذ بملامسة جروحك
ويحب يشارك الناس و ياخذ افكارهم حول جرحك << لعانه


امثلة تحاكي الواقع باختصار

تهاني
امرئة متزوجة و على ذمة زوجها .. عنده 5 بنات و تتمنى انها ترزق بولد
--


في جمعة كبيره و امام الجميع
* تهاني ماعندك نيه تجيبين عيال
تهاني : الا والله ادعي لي
* الله يرزقكم ان شاء الله لو بيدي عطيتك اثنين من المهبل الي عندي او تدرين خوذيهم كلهم مابيهم
تهاني : !!
* طيب زوجك عايش الوضع عادي ؟؟
تهاني : الحمد لله
* طيب ماعنده نيه يتزوج ثانيه ؟
تهاني : عرضت عليه لكن رفض
* طيب تبين ادور له وحده ؟
تهاني : يالله استاذنكم يابنات اشوفكم على خير باذن الله

==

فهد
شاب اجتهد بدراسته و تخرج ولكن ما حصل الوضيفة الي تناسبة
--

* فهد شخبارك بشرني عنك
فهد : الحمد لله كل شي تمام
* ما قلت لك! ابوي دبرلي وضيفة زينه براتب حلو ..هذا غير التوصية و البدلات
فهد : كفوو بالتوفيق يارب شد حيلك
* عاد دامني لقيت الوضيفة الزينه خلاص حصلت كل الي اتمناه بدور لي بنت الحلال ابي اعيش حياتي مثل الناس ..
فهد : الله يوفقك يارب
* خلاص اجل دامني توضفت اصبر لين اصير مدير بعدين اشغلك عندي ههههاي
فهد : طيب ياحلو حبينا نسلم عليك ونشوف اخبارك يالله مع السلامه !!

==

هند
شابه في اواخر العشرينات متوسطه الجمال تتمنى الزوج الصالح وتكون ربة منزل و تشوف عياله

* تدرين ياهند قبل زواجي كم مره انخطبت ؟
هند : كم ؟
* حوالي اكثر من ثلاثين مره انخطبت و ارفض الين ما اكمل دراستي ويوم خلصت الحمد لله جاء نصيبي الي رضيت فيه ..
هند : ماشاء الله
* تدرين حتى بعد ما تزوجت كل ما رحت عرس انخطب ..
وحتى وانا حامل وبطني قدامي انخطب
هند : طيب حبيبتي بسكر واكلمك وقت ثاني ان شاء الله






الخلاصة
في اناس سبحان الله يستمتع بدغدة او اثارة جروحك وحتى لو انت اقرب الناس لهم
حتى احترت في تسمية هالنفسيات المتبلده هذي

هل هي سذاجه ام دلاخه ؟
ام هي ملامة وتجاهل المشاعر بقصد ابو بدون؟
او هو على نياته لمحاوله معرفة سبب المشكله وحلها ؟

كلمة لمن يعاني من هالجروح
من الافضل اذا مريت بهالضروف ان تكون متبلد احساس لان هالشيء اجباري و يستحال فهم جرحك واللي تحس فيه مو حاسين فيه هم و النار ماتحرق الا رجل واطيها
مستحيل تعدل الناس و طريقة تفكيرهم ابدا بنفسك و ارضى وا قتنع بما كتب لك . (رازقك هو خالقك)











مع تحياتي

أأسيرة الأحزان

اسمحي لي أن ابدي اعجابي بما سطرت أناملك ..

طرح كعناقيد من اللؤلؤ ..

دمتي لنا بهذا التميز ..


اعذب التحايا ..

انارت سماء صفحتي بحضورك
الراقي



أسيرة الأحزان

اسمعي يابعد روحي انا اسميها لقافه وسماجه اللي يسوي الاشياذي ودك تدفنينه وهو حي ياكثر ماتمر لاشكال ذي علي لاكن صدقتي لازم الواحد يكون عديم احساس مع الاشكال ذي ومشكوووره ع طرحك الاكثر من رائع للبى روحك

وانا اقول وشفي موضوعي يبرق
أثاريه في هاجسي صمت موجوده ولا ينهان أخوي حالي الذوق